Pleisterplaots veur de ziel

Iech loup nog zjus op tied de kleuterwc’kes in um te zien wie miene kleine batteraof P z’ne kop in de pot stik … en de wc aoftrèk. Iech geef ‘ne keek en sjaar ‘m bij zie bendsje. Twie knalblauw ouge in ‘n lekker mojl loere miech straolend aon. “Naat,” zeet heer blij. Wie kinste noe koed op zoe joonk zien? Nao twie brookplassers en eine speijer kin dit ouch nog wel debij.
Es mien viefentwinteg sjattekes nao hoes zien, bin iech touw aon koffie. Nou jeh … oet d’n otomaat kump e werm, broen brouwselke este op de knóp “koffie” duits. Inmiddels bin iech draon geweend meh lekker is aanders.
Zo. Noe mails beantwoorde, e begin make aon de nuitsbreef, de moojerkesdaag-kedokes die  vasgeplak zitte aon de vinsterbaank losfriemele en daan vergadere. Euver wat allemaol neet mie maag, hiel väöl, en wat allemaol moot. Nog väöl miejer. En toch … mien directrice vraog miech häör te maile euver mien winse veur koumend sjaoljaor. Mèt stip op ein sjrief iech häör: lierkrach gróp 1-2.
Op weeg nao hoes sjees iech de bieb in en oet, sjäör iech in hoeg tempo door de supermerret, kook thoes nog gezoond ouch veur maan en dochter en spring d’n oto in. “Mam, hoofste niks aanders aon?” reup mie keend in shock. Iech zeen noe pas de spetters op mien bloes. Geinen tied mie. “Dat zuut niemes!” roop iech door ’t ope ruutsje. Es iech de straot oet rij, veul iech mien haore doorein wejje … Iech kin noets ins fetsojndelek örgens aonkoume.
De Rieksweeg vaan Mestreech nao Wittem is prachteg. ’t Joonk greun gief ’t landsjap e vruntelek veurjaors-jeske, de zon sjijnt alle zörg weg. Veur mien doen vin iech de Kloesterbibliotheek in Wittem vrij gaw en aongenaom verras loup iech nao binne. “Pleisterplaats voor de Ziel” weurt ’t geneump. Dat veul iech metein; alle oonrös vaan d’n daag vèlt weg en maak plaots veur ’n deep content geveul. Hei mage veurleze, in zoe’n bieb, wat ’n ier, wat e fees! Bieb, dat is gein woord veur die sjitterende umgeving. De veuls de rös vaan ‘t kèrkeleke en tegeliek de inspiratie door al die beuk. Prachteg. Iech geneet al veurtot ’t is begonne. En es ’t daan begint … Iech lees veur, vertèl, bin in mien elemint.
De meziek heet get betouverends. Leefdesleedsjes, zoe sjoen, ’t raak miech tot in mien ziel. Dees plaots deit ziene naom ier aon. ‘ne Collega-sjrijver vertèlt mèt ’n stum die zoe werm is, zoe deep vaan klaank tot iech alles um miech heen vergeet. Iech verstaon neet eder woord vaan zien dialek meh iech begriep boe heer ’t euver heet. De klaanke zègke genóg. Wat is taol sjoen, wat kin taol mèt ‘ne mins doen! D’n aovend is te gaw veurbij. ’t Had nog ore mage dore. Veer hawwe kontak, zègge veer tegenein. Lui vaan de organisatie, de muzikante en de leve sjrijver mèt zien prachteg dialek.
Zoonder de radio aon te zètte rij iech in d’n duuster nao hoes. Miene kop zit nog vol meziek, wäörd en klaanke. Dat wèl iech vashawwe, neet verstore.
De kat zit op de deurmat te wachte. Iech zèt miech op de baank. Evekes alles laote bezinke. Pleisterplaots veur de ziel. Mèt rech.
Vivianne Rijnders©

wittem

L3

Advertenties

4 gedachtes over “Pleisterplaots veur de ziel

  1. Vivianne iech höb dien sjoen verhaol weer met hiel vaol plezeer geleze. Iech wins diech un sjoen en welverdeende vekantie, geneet de devaan !!! Vaol leefs vaan Marij.

    Like

  2. Weer een prachtig verhaal geschreven Vief. Ik heb er weer van genoten tijdens mijn vakantie op het inmiddels bekende eiland. En de plek waar jij bent geweest is voor mij heel herkenbaar.
    Geniet van de vakantie.
    Lieve groet,
    Myra

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit /  Bijwerken )

Google photo

Je reageert onder je Google account. Log uit /  Bijwerken )

Twitter-afbeelding

Je reageert onder je Twitter account. Log uit /  Bijwerken )

Facebook foto

Je reageert onder je Facebook account. Log uit /  Bijwerken )

Verbinden met %s